Lionel Messi artıq “Pari Sen-Jermen”in futbolçusudur. Argentinalı superulduz Fransanın paytaxtına gələrək yeni komandası ilə 2 illik müqavilə imzalayıb. Sövdələşməyə əsasən bu müddət daha 1 il artırıla bilər. Messi keçidlə bağlı təssüratlarını da bölüşüb. O, belə bir seçim etdiyi xoşbəxt olduğunu vurğulayıb. “Pari Sen-Jermen” böyük məqsədləri olan komandadır. Karyeramda yeni səhifə açdığım üçün məhz bura gəlməyim daha məqsədəuyğun idi. Parisdə yeni uğurlar qazanmaq üçün bütün gücümü səfərbər edəcəm. Meydana çıxacağım günü səbirsizliklə gözləyirəm”.
Lionel Messi yeni komandasında 30 nömrəli formayla mübarizə aparacaq. O, bonuslarla birgə 1 ilə təxminən 35 milyon avro qazanacaq. Təcrübəli hücumçunun 18 il şərəfini qoruduğu “Barselona”da mümkün bütün titullara yiyələndiyi vurğulanmalıdır. O, Kataloniya klubunun heyətində 10 dəfə İspaniya çempionu olub. ölkə kuboku yarışında 7 dəfə qızıl medala yiyələnib. 8 dəfə superkuboku qazanıb. UEFA Çempionlar Liqasında 4 dəfə qələbə sevinci yaşayan Messi UEFA Superkuboku və klublararası dünya çempionatı yarışlarında 3 dəfə ali mükafatın sahibi olub. 34 yaşlı futbolçu bu il Argentina millisinin kapitanı kimi “Copa America” turnirində çempion olaraq seçmənin heyətində ilk titulunu qazanıb.